2009

Каруселі

Міргнуць не паспелі,
І ўсе каруселі
Дашчэнту згарэлі
У летніх баях.

Першы восеньскі вецер
Заручыў смоль і смецце,
І крывавым дасвеццем
У шэрані шлях.

Ля касавай будкі
Ляжаць незабудкі,
Амаль нічагуткі
не помнячы ўжо.

Толькі восеньскі вецер
Нагадаў ім аб смерці.
На крывавым дасвецці
Час плача імжой.

Цяпер, а не потым,
З вялікай ахвотай
Салдацкія боты
Па бруку ідуць.

Хітры восеньскі вецер
Ім шапоча аб леце,
А ў крывавым дасвецці
на дне каламуць.

2009 г.