Спакушэньне Трышчана
Здравствуй, мама. Плохие новости.
Герой погибнет в начале повести.
Земфира Рамазанова
Як стрываць мільгатню санта-барбар,
там, дзе вязы на вуліцах спрэс?
Запусьціць мо' адронны калайдэр?
Ці гарошыны скрасьці ў прынцэс?
Адпісацца ад стужкі навінаў?
Сацыяльныя сеткі парваць?
Мо' Мальвіну адбіць у дравіны?
Ці Лявоніхі ўспомніць пастаць?
Ці прыкінуцца парнем з раёну,
пець пра чыкаў і рускіх рабят?
Быць такім, як дзесяткі мільёнаў?
Блытаць джала, джэдая й джыхад?
Не любіць беларускую мову?
На такійскі падрочваць гатэль?
Распачаць на вядзьмарачак ловы?
З Рыбентропам пасмоктваць кактэйль?..
Шмат дарог. Варыянтаў багата.
За дзьвярыма Хеопс і Рамзэс.
Дзесь пад шафай ляжаць твае латы
і падручнік: Франц Кафка "Працэс".
9 ліпеня 2008 г. 
