2008

Шматкроп'е
Прысьвячаю Джульет Льюіс
Ад зьмярканьня да сьвітаньня
я шукаў сваё каханьне
між вампіраў, ваўкалакаў
я хадзіў, блудзіў і плакаў.
Вывучаў старыя карты,
падбіраў старыя жарты,
страты моўчкі занатоўваў,
слухаў курсы анатомій
модных творчых накірункаў,
не насіў майткі ў карунках,
паглынаў кіндэр-сюрпрызы,
цыраваў манашкам рызы,
абыходзіў бокам цыркі,
аб баржомі пляжыў ныркі,
пляжных коміксаў баяўся,
два разы згубіўся ў часе,
тры разы ў самотных вуснах,
тры разы ў іспытах вусных,
ды знаходзіўся заўсёды,
раны гоіў майскім мёдам
з рук дакторкі Медуніцы,
замаўляў зь вяндлінай піцы,
праклінаючы дарогі
да каханьня і вымогі
кожных новых праважатых.
Сьвяткаваў у магістратах
кожны свой правал чарговы.
Шанаваў дзень чацьвярговы.
Ставіў кропку нечакана
перад войскам Чынгісхана.
Для каханьня трушчыў коп'і,
а яно ўсё за шматкро'ем...

25 лістапада 2008 г.