Кажуць, што ў англамоўным сьвеце набіраюць папулярнасьць інтэрпрэтацыі клясычнай літаратуры для мікроблогу
Twitter, дзе памер паведамленьня абмяжоўваецца 140 знакамі. Сьцьвярджаецца, што на Twitter ушчыльнілі нават 1000-старонкавага «Уліса» Джойса. Вось і я, натхніўшыся магчымасьцямі мікраблогінгу, вырашыў ушчыльніць колькі твораў літаратуры Беларусі розных эпохаў.
«Слова пра паход Ігараў»Князь Ігар пайшоў у паход на полаўцаў без увагі на благія прыкметы. Мусіў уцякаць. І гэта на тле цёмных месцаў і згадак Усяслава Чарадзея.
Мікола Гусоўскі (Узоўскі) «Песьня пра зубра» Аўтар расказвае рымскаму папе пра сябе, зубра, часы князя Вітаўта і хоча, каб у сьвеце не было войнаў.
Афанасій Філіповіч «Дыяруюш» Аўтар вандруе між Масковіяй і Польшчай, дбае аб праваслаўі і бачыць галюцынацыі.
Саламея Пільштынова-Русецкая «Авантуры майго жыцьця»Доктарка з Наваградчыны мяняе мужа і месцы жыхарства. Нават да Асманскай імпэрыі дабралася. А расійская імпэратрыца звала яе: "дружочек".
Адам Міцкевіч «Пан Тадэвуш»Пан Тадэвуш кахае Зосю, але адносіны між іх фаміліямі напружаныя. Напружаньне зьнікае з прыходам расейскага атраду.
Вінцэнт Дунін-Марцінкевіч «Ідылія»Паненка Юлія пераапранаецца ў сялянку, каб рознымі хітрыкамі перавыхаваць земляка, які любіў цёгацца па Эўропе і захапляўся ўсім замежным.
Францішак Багушэвіч «Кепска будзе»Хлопцу ня шэнціць ад самых народзін. Нават імя ў яго абы якое - Аліндарка, не кажучы ўжо аб ягоным вельмі кепскім жыцьці.
Янка Купала «Тутэйшыя»Хлопец Мікіта спрабуе адаптавацца да кожнай новай улады ў Менску. Але сьвядомы беларус Янка яму перашкаджае.
Якуб Колас «На ростанях»Настаўнік Андрэй Лабановіч шукае сябе, пакуль не прыбіваецца да бальшавікоў.
Андрэй Мрый «Запіскі Самсона Самасуя»Чыноўнік Самасуй хоча скарыстацца службовым становішчам і заняцца любоўю зь яўрэйкай Крэйнай. Але яна кахаецца з больш важкай рыбай.
Вацлаў Ластоўскі «Лябірынты»Пасьля бутэлькі і размовы з аматарамі полацкай гісторыі герой патрапляе пад зямлю, дзе ёсьць артэфакты магутнай крыўскай цывілізацыі.
Іван Мележ «Людзі на балоце»Цяжкасьці каханьня Ганны Чарнушкі і Васіля Дзятліка на тле калектывізацыі беларускага Палесься.
Уладзімір Караткевіч «Каласы па сярпом тваім»Князь Аляксандар Загорскі з-за спэціфічных мэтадаў выхаваньня вырастае Алесем, любіць Беларусь, хоча свабоды для ўсіх, кахае Майку Раўбіч.
ВасільБыкаў «Знак бяды»Старая і стары церпяць зьдзекі нямецка-фашысцкіх акупантаў, успамінаючы, што пры бальшавіках ім было не на шмат лепш.
Адам Глёбус «Дамавікамэрон»Розныя дэманы і пачвары любяцца і кахаюцца зь людзьмі. Ну, і людзі ад іх не адстаюць.
Альгерд Бахарэвіч «Ніякай літасьці Валянціне Г.»Літаратурнага крытыка рознымі спосабамі даймае і цкуе пісьменьніца ў інвалідным вазочку. Крытык наважваецца на крайнія меры супрацьдзеяньня.
18.05.2009 г.
P.S. Спадзяюся, што непапраўным гультаям і рознашорсным ненавіднікам беларускае літаратуры зь ліку шкаляроў і студэнтаў, чые пальцы сьцёртыя дашчэнту ад тайпаньня ключавых словаў
"в сокращении",
"сокращенка" і да т.п., гэтая анталёгія безьмежна спадабаецца.
